Dvije žene, optužene za vještičarenje, brutalno su ubijene u jednom selu u Tanzaniji pošto su muškarci tvrdili da su na njih bacile čini zbog čega su postali impotentni, saopštila je danas policija.

U sjevernoj provinciji Shinyanga u utorak uvečer ubijene su 80-godišnja žena i njena 45-godišnja kćerka.

Trojica muškaraca su im prvo prerezala grkljane, a potom na dijelove isjekla njihova tijela, prenijela je agencija AFP.

Šef lokalne policije Justus Kamugisha je rekao da je njihov komšija, koji vjeruje da su one krive za njegovu impotenciju, osumnjičen za napad i da je uhapšen.

Taj 40-godišnji muškarac je optužio žene da su mu prošle godine otrovale majku.

“Žrtve su napadnute dok su se spremale da večeraju”, kazao je Kamugisha.

Prošle nedjelje, sedam osoba, takođe optuženih za vještičarenje, poginulo je na zapadu Tanzanije pošto su kolibe u kojima su živjeli zapaljene.

U mnogim dijelovima Tanzanije i dalje je snažno vjerovanje u vještice i crnu magiju.

Lokalni Centar za ljudska prava navodi da svake godine bude linčovano oko 500 “vještica”.

Prema podacima tog centra, oko 3.000 ljudi, većinom starijih žena optuženih za vještičarenje, ubijeno je u Tanzaniji između 2005. i 2011. godine.

Ta grupa za zaštitu ljudskih prava ukazuje da su crvene oči znak vještičarenja prema mišljenju stanovništa, čak i ako su nastale od posljedica upotrebe kravlje balege za gorivo u siromašnim zajednicama.

Centar je naveo da mnogi mještani vjeruju da vračanje stoji iza svake nevolje – od neplodnosti i siromaštva do neuspjeha u poslu, gladi i zemljotresa.

U posljednje vrijeme sve više albino ljudi je meta napada, kao i djeca. U Tanzaniji se vjeruje da amajlije napravljene od dijelova tijela albino ljudi donose sreću i napredak.

Albinizam je genetsko oboljenje čija je posljedica nedostatak melanina u koži, kosi i očima.