Tužilaštvo Tribunala u Hagu zatražilo je danas od sudskog vijeća da ukine odluku o privremenom puštanju na slobodu haškog optuženika i predsjednika Srpske radikalne stranke (SRS) Vojislava Šešelja, jer je svojim ponašanjem direktno narušio osnove odluke Sudskog vijeća o njegovom oslobađanju.

U saopštenju se navodi da tužilaštvo od sudskog vijeća traži da ukine odluku o privremenom oslobađanju Šešelja, da po njegovom povratku u pritvorsku jedinicu hitno zakaže novo ročište kako bi se, između ostalog, utvrdilo njegovo zdravstveno stanje.

Tužilaštvo od sudskog vijeća traži i da se utvrde odgovarajući uslovi za eventualna buduća provremena oslobađanja i da li je Šešelj voljan da poštuje sve neohpodne uslove narednog privremenog oslobađanja.

Tužilaštvo podsjeća da je Sudsko vijeće, u odluci o privremenom oslobađanju Šešelja, reagovalo “striktno na humanitarnoj osnovi” nakon što je dobilo povjerljivu informaciju o pogoršanju zdravstvenog stanja optuženog.

“Usljed zabrinutosti, Sudsko vijeće je smatralo da je neophodno da se nametnu samo minimalni uslovi za Šešeljovo oslobađanje, prvenstveno da ne utiče na svjedoke i žrtve, da ne ometa tok pravde i da se pojavi pred sudom kada se to od njega zatraži”, podsjeća tužilaštvo.

Tužilaštvo Tribunala smatra da je sada očigledno da je zabrinutost Suda zbog zdravstvenog stanja Šešelja bila neosnovan”.

“Šešelj je izjavio da se neće vratiti u Hag. Prijetio je ljudima koji sarađuju s tužilaštvom, jasno je iskazao da mu zdravstveno stanje ne predstavlja smetnju da u javnosti daje zapaljive izjave i da vrijeđa žrtve”, navodi se u saopštenju tužilaštva.

Predsjednik SRS Vojislav Šešelj se 12. novembra, poslije skoro 12 godina, vratio u Srbiju, nakon što je pušten na privremenu slobodu zbog lošeg zdravstvenog stanja.

Sudsko vijeće Haškog tribunala donijelo je 6. novembra odluku da Vojislav Šešelj bude privremeno pušten na slobodu, a Vlada Srbije prethodno je tribunalu dostavila garancije za njegovo oslobođenje.