Predsjednik Srbije Aleksandar Vučić izjavio je danas da bi kompromis u rješavanju problema sa Kosovom bio "ljekovit za odnose Srba i Albanica", ali da je "loš trik" pokušaj da se izjednačuju prava Srba na Kosovu sa pravima Albanaca koji žive u centralnoj Srbiji, i da toga neće biti.

Vučić je na sjednici parlamenta, povodom zahtjeva o izjednačavanju prava koji je iznio poslanik “Koalicije Albanaca doline” Šaip Kamberi, rekao da je to “loš trik”, jer Srbija i Kosovo “niti su dvije države, niti imaju isti državnopravni status”, jer “Kosovo nije država”.

Kamberi je na posebnoj sjednici o Kosovu rekao da je “politička i institucionalna diskriminacija Albanaca često posljedica tenzija između Srbije i Kosova” i da vjeruje da je “pronalaženje uravnoteženih odnosa dobar iskorak ka odnosima Srbije i Kosova”.

On je naveo da su u iluziji oni koji vjeruju da je “zamrznuti konflikt” dobro rješenje, jer očekuju da će se jednog dana raspasti NATO i Evropska unija i pozvao vlast u Srbiji da prihvati francusko-njemački prijedlog u kome se navodi da se svi konflikti Srbije i Kosova “rješavaju mirnim putem”.

Vučić je odgovorio da je to što Kamberi govori “politika (kosovskog premijera) Aljbina Kurtija, a ne nekog drugog” i “pokušaj rušenja svega i nesagledavanje realnosti”.

“Jednako koliko mi Srbi ne sagledavamo realnost i Albanci je ne sagledavaju. Dobro ste primijetili da se zalažem za mir i ne interesuje me da li mi vjerujete ili ne, pošto vjerujete Aljbinu Kurtiju. Odlično znam šta radite, kod mene ti trikovi ne prolaze”, kazao je Vučić.

Vučić je optužio Kamberija da je Srbe u izjavama koje je davao na Kosovu nazivao “genocidašima”, a da je Srbiju kao “državu od koje dobija hljeb” nazivao “fašističkom državom”.

“Snove puste o izjednjačavanju pozicije da prestanete da sanjate. Bilo kakvih iluzija po tom pitanju ne možete da imate. Moja vrata su otvorena, imate mnogo prava, nema napada na vašu djecu kada slavite Bajram”, rekao je Vučić.

Program N1 televizije možete pratiti UŽIVO na ovom linku kao i putem aplikacija za Android|iPhone/iPad